Njësitë e specializuara të Policisë Kufitare të Shqipërisë, në bashkëpunim me kolegët e tyre nga Kosova, po tregojnë suksese në luftën kundër krimit dhe kontrabandës.
Në gjashtëmujorin e parë të këtij viti, patrullimi i përbashkët i kufirit ujor dhe të gjelbër Shqipëri-Kosovë në pikat kufitare Morinë dhe Vërmicë bëri të mundur parandalimin e 22 rasteve të kontrabandës me mallra.
Shaban Osmanolli, udhëheqës i njësitit patrullues të Policisë Kufitare të Kosovës u shpreh se rezultatet e patrullimit të përbashkët kanë qenë shumë të efektshme, siç ishte rasti i kontrabandës me duhan dhe parandalimi i kalimeve ilegale si dhe trafikimit të qenieve njerëzore.
Ndërkohë, për kontrollin e ujërave territoriale në Vërmicë dhe Morinë po përdoret një motobarkë e përbashkët e dy vendeve.
Ndërsa vëzhgimi i terrenit kryhet nga ekipe të specializuara të dy policive, duke bërë që numri i rasteve të kontrabandimit të ulet ndjeshëm.
Zonat kufitare të Qarkut të Kukësit, shpesh janë keqpërdorur nga individë apo grupe për kalim mallrash kontrabandë. /shekulli/