Parregullsitë në sektorin e ndërtimtarisë dhe të arkitekturës gjatë viteve të fundit kanë qenë burim frustrimi për dy arkitektë të rinj kosovarë, të cilët rrugëdaljen nga ky kaos e kanë gjetur në prodhimin e figurinave me karakter historik, që përfaqësojnë vlerat e trashëgimisë kombëtare.
Edon Mullafetahu dhe Betim Vitija kanë mundësuar që fragmentet e historisë të shndërrohen në dhurata të vogla. Por nuk mbesin vetëm suvenire. Shërbejnë edhe për sensibilizimin e blerësve për trashëgiminë kulturore dhe historike. Kjo formë kreative atyre u ka mundësuar vazhdimin e kontributit për ruajtjen e këtyre vlerave, por edhe përfitimin material drejt arritjes së synimit për pavarësi financiare për të ushtruar profesionin në mënyrë të mirëfilltë,shkruan Koha Ditore.
Produktet në miniaturë të ideuara nga Mullafetahu e Vitija shiten në një kioskë prej druri e xhami në qendër të Prizrenit, afër Urës së Gurit, ku ka shumë vizitorë e turistë, por mund të gjenden edhe në dyqane suveniresh në tërë Kosovën. Edhe Urën e Gurit e kanë shndërruar në miniaturë. Mund të blihet për pak para, por kjo nuk është e vetme në menynë e tyre.
Trashëgimia kulturore në pëllëmbë të dorës
Edon Mullafetahu kujton se si para tri vitesh frustrimi me zhvillimet në urbanizëm kishte arritur pikën e vlimit dhe se bashkë me kolegun Vitija duhej të merrnin një vendim që të dilnin nga ky rrethim, që fillonte nga mospagesa e klientëve e përfundonte me shpërfilljen e plotë të profesionit nga ana e investitorëve…