Projektimi i filmave në shoqëri të krijuesve ndërkombëtarë ka vazhduar në ditën e tretë të “DokuFestit”, teksa fokusi i programit ka qenë në paraqitjen e veprave të regjisorëve amerikanë.
Madje për të nderuar praninë e kineastëve të këtij vendi Ambasada e Shteteve të Bashkuara të Amerikës në Prishtinë ka organizuar një ndejë të veçantë ku udhëheqësja e këtij misioni diplomatik ka vlerësuar festivalin e filmit që mbahet në Prizren për mundësimin e shkëmbimit kulturor mes përfaqësuesve globalë të industrisë së filmit dokumentar, shkruan Koha Ditore.
Ambasadorja Tracey Ann Jacobson, të hënën mbrëma, ka qenë nikoqire e edicionit të dytë të Natës amerikane brenda “DokuFestit”, me ç’rast ka rikujtuar se Ambasada e ShBA-së dhe ajo Norvegjeze kanë mbështetur hapjen e “DokuKinos”, respektivisht kinemasë së parë në hapësirë të mbyllur në Prizren që prej përfundimit të luftës. Por ajo ka shtuar se është veçanërisht e kënaqur që në edicionin XIII të “DokuFestit”, ka prani të madhe të filmave dokumentarë të krijuar nga regjisorët amerikanë.