Sonte në kuadër të Panairit promovohet vepra “Vuajtje në Ethe” e autorit Gani Elshani, me fillim prej orës 19:00 në Kejin përballë Xhamisë së Sinan Pashës.
Panairi i Librit në Prizren sivjet ka nisur me datë 25 e do të zgjasë deri në ditën e fundit të këtij muaji. Sonte në kuadër të Panairit promovohet vepra “Vuajtje në Ethe” e autorit Gani Elshani, me fillim prej orës 19:00 në Kejin përballë Xhamisë së Sinan Pashës. Panairi tradicional i Librit organizohet nga Asociacioni për Kulturë, Edukim dhe Arsim – “Akea” nga po ky qytet. Ky është edicioni i gjashtë i Panairit.
Ditëve të kaluara në këtë Panair janë promovuar libra nga të gjitha trevat shqipfolëse.
Shkrimtarja boshnjake nga Prizreni, Fehmije Murati ka promovuar krijimtarinë e vetë letrare për dashamirët e fjalës së shkruar në gjuhën boshnjake. Në takim u paraqitën kumtesa dhe u lexuan poezi të autores.
Vepra më e re e Nexhmedin Spahiut “Foshnjëria e kombit kosovar” u promovua në kuadër të Panairit të Librit “Prizreni 2014”. Me kumtesë për veprën në fjalë u paraqit profesori nga Universiteti i Sofjes, Anton Pançev. Pas elaborimit të tematikës së veprës, autori Spahiu u përgjigj në një mori pyetjesh nga publiku.
Panairi i Librit në Prizren ishte nikoqir edhe i promovimit të shkrimtarit Skënder Zogaj. Gjatë mbrëmjes u lexuan poezi të autorit dhe u paraqitën kumtesa. Programin e karakterizoi edhe shpërfaqja e një mori kujtimesh mes Skënder Zogajt dhe krijuesve tjerë letrarë nga Prizreni. / KultPlus.com