Zyrtarë nga partitë e bllokut LDK-AAK-Nisma dhe Vetëvendosje paralajmërojnë mundësinë e përsëritjes së skenarit të njëjtë me kryesuesen e seancës Flora Brovina.
Ata thonë se nëse ajo vazhdon me bllokimin e Kuvendit, do të zëvendësohet sikur në seancën e kaluar. Blloku kërkon që Kuvendi të mblidhet këtë javë, ndërsa paralajmëron mundësinë e thirrjes së seancës së jashtëzakonshme. Analistët politikë nuk shohin zgjidhje, pa marrëveshje mes dy blloqeve
Blloku LDK-AAK-Nisma dhe Vetëvendosje po konsiderojnë se Flora Brovina si kryesuese e Kuvendit në bazë të moshës, po mban pozicion përkrahës ndaj PDK-së. Por, sipas tyre, kjo nuk do të zgjas përjetësisht. Deputetja e AAK-së, Donika Kadaj-Bujupi thotë se do t’i gjendet zgjidhja kësaj bllokade.
“Është një proces i cili përjetësisht nuk do të zgjas, sepse do të organizohemi po ashtu bazuar në rregulloren e Kuvendit, në mënyrë që të kërkojmë që nëse në të ardhmen vazhdon rezistimi nga ana e kryesueses për të mos udhëhequr këtë seancë, e njëjta do të zëvendësohet siç parashihet në rregulloren e Kuvendit dhe ligjet në fuqi”, tha Kadaj-Bujupi për Radio Kosovën.
Por, se kur do të mbahet kjo seancë ende nuk dihet. Dardan Molliqaj nga Vetëvendosje nuk e përjashton mundësinë e thirrjes së seancës së jashtëzakonshme.
“Ne nuk do të thërrasim seancë të jashtëzakonshme derisa Flora Brovina ta thërras seancën. Nëse zonja Brovina nuk e thërret seancën, do ta thërrasim ne seancën e jashtëzakonshme”, tha Molliqaj për Radio Kosovën.
Deputetja e AAK-së, Kadaj-Bujupi thotë se nuk ka kohë për të humbur për mbajtjen e kësaj seance.
“Konsiderojmë që kjo duhet të ndodhë brenda kësaj jave dhe sa më shpejtë”, tha Kadaj-Bujupi.
Cilido bllok që propozon kandidat për kryeparlamentar, për analistin Artan Muhaxhiri, çështja e kryeparlamentarit do të mbetet e pazgjidhur nëse nuk ka marrëveshje.
“Mund të ketë kandidime të pafundme të deputetëve, mirëpo nëse nuk ka marrëveshje, atëherë as kandidati i PDK-së, por as i LAN-it, nuk mund të zgjidhet”, tha Muhaxhiri.
Ndryshe, PDK-ja të cilës, Gjykata Kushtetuese ia ka njohur të drejtën e patransferueshme të kandidatit për kryeparlamentar, thotë se është e gatshme për të biseduar me partitë tjera, porse thekson se nuk bën kompromis mbi vullnetin e qytetarëve dhe mbi vendimin e Gjykatës Kushtetuese.