Kryetari i Komunës së Rahovecit, Idriz Vehapi, e ka pezulluar përkohësisht nga vendi i punës zyrtarin komunal për paga, Hasan Hoti. Këtë e ka bërë të ditur të mërkurën drejtori për Buxhet dhe Financa, Lulzim Sylejmani. Ai ka thënë se e kam njoftuar Zyrën e Personelit për mosdalje në punë të Hotit për shkak të dyshimit se ndaj tij po zhvillohen hetime rreth keqpërdorimit të detyrës zyrtare, dhe zyrtarë të kësaj zyre kanë zhvilluar procedura sipas ligjit, shkruan Koha Ditore.
“Në bazë të Ligjit të vetëqeverisjes lokale (LVL), nr.03-L-040,neni 69 të Ligjit për shërbyesit civil neni 8 paragrafi 1.1,të Rregullore së MAPL-së nr.04/2011 për procedura disiplinore në shërbimin civil, Hasan Hotit në marrëdhënie pune në kohë të pacaktuar dhe i sistemuar si zyrtar për paga në Drejtorinë për Buxhet dhe Financa, i shqiptohet masa e pezullimit dhe i parandalohet puna në kohëzgjatje prej 3 muajsh, saktësisht prej 01.10.2014 deri më 01.01.2015,me pagesë 50 për qind të pagesë mujore”, thuhet në vendimin numër 3644 të firmosur nga Vehapi, të cilin e ka parë gazeta.
Vendimi i kryetarit të Rahovecit në fakt ka ardhur dy javë pasi që ky zyrtar është arrestuar nga Policia e Kosovës. ”Është arrestuar një zyrtar komunal në Rahovecit të martën (23.09.2014 v.j.) rreth orës 13:30, i cili dyshohet se ka kryer veprën penale “keqpërdorim të pozitës apo autoritetit zyrtar”. Personi i arrestuar është H.H,i lindur më 1971, zyrtar në Kuvendin Komunal të Rahovecit. Bazuar në hetimet preliminare dyshohet se personi i dyshuar tashmë i arrestuar nga Policia kishte keqpërdorur pozitën e tij zyrtare, pasi që zyrtari në fjalë kishte banuar në dy banesa dhe për të dyja banesat Komuna e Rahovecit kishte paguar energjinë elektrike.
Të dy njehsorët ishin regjistruar në emrin e zyrtarit në fjalë dhe pagesa e regjistrimit të njehsorëve është bërë nga buxheti komunal i Rahovecit në shumë prej 2.159.00 eurosh”, është thënë në raportin e Policisë së Kosovës.
Ndërsa drejtori Sylejmani ka treguar se me qëllim të kryerjes së procedurave dhe mbarëvajtjes së punëve i vetmi person që ka qenë i certifikuar në Komunën e Rahovecit është Arben Sokoli,të cilin me vendim e kemi emëruar ushtrues detyre në pozitën të cilën e ka udhëhequr Hoti.
”Ky do të jetë u.d. deri në momentin që do të marrim njoftimin zyrtar lidhur me hetimet që janë duke u zhvilluar ndaj atij punëtori”, ka potencuar Sylejmani,sipas të cilit prej dy javësh arrestimi të këtij zyrtari Komuna nuk kanë marrë kurrfarë njoftimi zyrtar nga Policia e Kosovës.
Gazeta Koha Ditore ka kontaktuar me telefon zyrtarin Hoti, i cili ka refuzuar të flasë. ”Më mirë ti këqyri punët e tua, e unë të miat”, është shprehur Hasani i pezulluar. /Koha Ditore/