Tiktaket e Sahat Kullës që ndodhet në qytetin e Rahovecit, së paku edhe këtë vit nuk do të lëvizin.
Akrepat e këtij objekti tash e dy vjet tregojnë orën 11:10 minuta. E Komuna e Rahovecit, nuk do ta riaktivizojë Sahat Kullën, për shkak të mungesës së mjeteve financiare në buxhetin e dikasterit të kulturës, shkruan Koha Ditore.
Osman Hasku, drejtor i Drejtorisë së Kulturës, Rinisë dhe Sportit në këtë Komunë, është arsyetuar se riparimi që duhet bërë në Beograd është shumë i kushtueshëm. Por, nuk ka dhënë një shifër të caktuar.
Restaurimi i këtij objekti para tre vjetësh është financuar nga organizata suedeze “Trashëgimia kulturore pa kufij”(CHWB) në vlerë prej 40 mijë eurosh, kurse Komuna e Rahovecit kishte participuar me 10 mijë euro. Punimet në këtë monument të vjetër prej 223 vjetësh kishin zgjatur dy vjet.
