Aktorë të ndryshëm nga lëmenjtë profesionalë, institucionalë dhe fetarë kanë shprehur qëndrimin se ndërtimi i një objekti në kuadër të monumentit arkeologjik të Kalasë së Prizrenit po bëhet në mënyrë të gabuar.
Sipas tyre, punimet në këtë strukturë janë realizuar pa siguruar gjurmë të mjaftueshme, pa plan të mirëfilltë dhe pa asnjë diskutim publik me komunitetin.
Arkeologu Vesel Hoxhaj beson se në këtë rast nuk janë siguruar dëshmi të bollshme për ekzistencën e mëparshme të objektit.
“Në Kalanë e Prizrenit po ndërtohet një objekt që më parë nuk ka ekzistuar”, ka thënë prerë Hoxhaj, duke shtuar se një gjë e tillë paraqet edhe shkelje të dispozitave ligjore që rregullojnë fushën e trashëgimisë kulturore, shkruan Koha Ditore.
Ndërsa deputeti i lëvizjes “Vetëvendosje”, Mytaher Haskuka, në një postim në rrjetet sociale ka vlerësuar se ky projekt po realizohet me shumë mangësi.