Refuzimi i presidentes, Atifete Jahjaga, që të kërkojë nga Gjykata Kushtetuese interpretim për pikën 127 të opinionit të kësaj gjykate, po e shtyn bllokun e partive politike LDK-AAK e Nisma që vetë të shqyrtojë një opsion të tillë. Për këtë LDK-AAK e Nisma, pritet që të vendosin në një takim që do të mbajnë të hënën. Do të vendosin vetë pa VV-në, pasi që partia e Albin Kurtit nuk e sheh gjykatën si opsion, shkruan Tribuna.
Bajram Gecaj, nga Lidhja Demokratike e Kosovës, ka thënë se janë të përgatitur që çështjen ta dërgojnë në Gjykatën Kushtetuese, megjithatë vendimi, sipas tij, do të merret javën e ardhshme.
“Të hënën, do të kemi një takim të partnerëve të koalicionit të madh dhe është e mundshme që në takim të merret një vendim i tillë, por nuk dihet se a do të vendoset të hënën apo ditëve në vijim.
Ne vërtetë kemi shpresuar që presidentja do të bënte këtë dhe do të ishte shumë më mirë që ajo ta bënte ketë, sepse presidentes i`u kanë drejtuar edhe minoritarët, faktikisht ju kanë drejtuar rreth 83 deputetë që ajo ta dërgojë këtë lëndë në Gjykatë dhe ne nuk shohim arsye, pse presidentja të mos i drejtohet Kushtetueses, kur një numër kaq i madh i deputetëve ia ka kërkuar këtë gjë”, ka thënë Gecaj.