Nënkryetari i PDK’së dhe Ministri në detyrë i Punëve të Brendshme, Bajram Rexhepi, s’është befasuar me deklarimet e fundit të zyrtarëve të Vetëvendosjes, të cilët kanë kërkuar që përmes protestave ta largojnë nga pushteti Kryeministrin Hashim Thaçi.
Sipas tij, Vetëvendosje vetëm po i kthehet metodave të vjetra të saj.
Bajram Rexhepi thotë për Politiko.net se nuk beson që një “ide e tillë e papjekur” do të gjejë mbështetjen e partnerëve tjerë të Koalicionit, LDK, AAK dhe Nisma.
“Së pari pushteti merret vetëm me votën e qytetarëve, në bazë të legjislacionit në fuqi dhe unë jam shumë i bindur që partitë tjera nuk do të bien pre e këtyre ideve që absolutisht janë të papjekura dhe do të ketë një pjekuri nga partitë tjera”, thotë Rexhepi.
“Kështu që protesta janë ato që më së paku i nevojiten Kosovës në këto momente”.
“Ata kanë pasur ambicie tjera për të ardhur në pushtet, por e shohin se nuk po mund të vijnë me metoda demokratike dhe tash po i kthehen formës së mëhershme. T’i kthehen ose po pretendojnë t’i kthehen formës së mëhershme”, deklaroi nënkryetari i PDK’së, Bajram Rexhepi për Politiko.net.
Ndryshe Lëvizja Vetëvendosje mendon se rruga e vetme për ta larguar Kryeministrin Thaçi nga pushteti është reagimi qytetar.
Andaj, ka kërkuar përkrahje nga partnerët e koalicionit LDK-AAK-Nisma.
“Mendoj se kjo është rruga e duhur në këto momente, për shkak se në gjitha pushtet e kriminalizuara dhe autoritare, përveç që është bashkuar opozita në ato vende, ajo ka dalë në rrugë dhe bashkë me qytetarët e ka ndërruar sistemin”, ka thënë Dardan Molliqaj i VV’së, duke shpresuar se një ide e tillë do të gjejë edhe mbështetjen e partnerëve të koalicionit, përkatësisht LDK’së, AAK’së dhe Nismës. /Politiko.net/