Bordi i Agjencisë Kosovare për Akreditim ka akredituar dhjetë programe, por ka refuzuar katër programe tjera në arsimin e lartë publik dhe në atë privat.
Në mesin e tyre janë dhe dy programet e Fakultetit të Matematikës për bachelor dhe master, ku për shkak të vonesave për aplikim, kishin mbetur pa u akredituar në mbledhjen e kaluar të AKA-së, raporton KTV.
Ferdie Zhushi Etemi, kryetare e Këshillit Shtetëror të Cilësisë, ka thënë se kërkesat e atyre departamenteve, që me vonesë kanë dorëzuar raportin për akreditimin e programeve të tyre, janë shqyrtuar në mbledhjen e fundit të Bordit.
Sipas Zhushi Etemit, të gjitha fakultetet duhet të njoftohen me kohë për procedurat e akreditimit dhe t’i sjellin me kohë aplikacionet.
Ndërsa, dekani i Fakultetit të Shkencave Matematike Natyrore, Tahir Arbneshi, i ka thënë KTV-së se vendimi i Bordit të AKA-së ishte i pritshëm. Ai ka treguar se menjëherë është hapur edhe konkursi për pranimin e studentëve të rinj.
Për mbylljen e këtyre programeve kishte pasur kritika të ashpra ndaj Agjencisë për Akreditim.