Në Universitetin “Ismail Qemali” në qytetin e Vlorës u zhvillua konferenca shkencore “Jeronim de Rada 1814-2014, personalitet i shquar i kulturës kombëtare”.
Folësit, mes të cilëve Prof. Dr. Bardhosh Gaçe, “Mjeshtër i Madh”, Prof. Dr. Nexhip Mërkuri, studiuesi himariot Foto Bixhili, pedagogia Enkelejda Billa, shkrimtari Çlirim Hoxha nga Biblioteka Publike “Shevqet Musaraj”, shkrimtarët Eqerem Canaj, Dr. Leka Skëndaj, u ndalën në ata elementë të veprës së De Radës, që e bëjnë atë një nga korifejtë e Rilindjes Kombëtare.
Sa më shumë kalojnë vitet, aq më shumë lartësohen malet e rilindjes sonë kombëtare”, theksuan referuesit, sipas të cilëve, Jeronim de Rada është padyshim një nga korifenjtë e kësaj Rilindjeje, një nga figurat më emblematike të letërsisë dhe kulturës sonë, që vazhdon të rrezatojë me të njëjtin shkëlqim të mahnitshëm prej 200 vjetësh. Në këtë konferencë u evidentua se, De Rada vjen në kohën tonë si një meteor i zbritur nga yjet, i cili përgjatë dy shekujve të udhëtimit të tij shpirtëror ka frymëzuar me dhjetra breza arbërorësh të gjakut të tij të shprishur, me fytyrë kthyer nga lindja e diellit, atje në brigjet ku këndohen këngët e mëmëdheut.
Referuesit theksuan se, De Rada vjen mes nesh me veprën e tij gjigante, vjen me “Këngët e Milosaos”, me “Serafinën e Topisë”, me Skënderbeun e Pafan, me Parimet e Estetikës (mendime rreth jetës dhe qëllimeve të saj), apo me përmbledhjen “Këngë popullore arbëreshe” etj. Ndërkohë, studentë të Universitetit “Ismail Qemali” recituan vargje nga krijimtaria e De Radës.