Dekani i Fakultetit të Arteve, Adem Rusinovci, flet për Tribuna për rastin e profesorit të larguar Alban Muja. Ai hedhë poshtë çdo akuzë që Muja kishte bërë ndaj tij për largimin nga detyra. Madje dekani thotë se nuk dëshiron të merret më këtë çështje, ngase sipas tij nuk ja vlen.
“Është shumë çudi që Alban Muja më atakon mua, prandaj nuk kam dashtë të merrem me diçka që nuk ka kuptim.
Paramendoni në një deklaratë ku ai kishte thënë se ai e ka akredituar drejtimin e Artit Konceptual dhe Mediat e Reja. Ky më të vërtet do të ishte turpi më i madh i këtij fakulteti, nga që Albani ka qenë vetëm student kur është biseduar për këtë drejtim. Madje ai për herë të parë për Artin Konceptual ka dëgjuar nga profesori i tij Mehmet Behluli”, pohon Rusinovci, shkruan Tribuna. Ai shprehet më tej se Fakulteti i Arteve nuk është shtëpi private dhe se Muja ka hyrë si profesor i angazhuar pa asnjë konkurs.
“Unë nuk dua të them as për gazetën tuaj, por opinioni dhe rektorati e din shumë mirë se kush e ka pru Albanin sepse nuk ka pasur konkurs fare. Unë nuk dua të përmend emra sepse nuk ma lejon etika, mirëpo Albani e din shumë bukur se kush e ka angazhua dhe në çfarë mënyre është angazhuar ai në Fakultetin e Arteve”, pohon Rusinovci.