Duhet të qartësohet fati i njëmijë nxënësve që po presin të nisin studimet në Universitetin e Prishtinës. Veteranët duhet të jenë të matur në protesta. Qëndrimet e Ministrisë së Arsimit dhe të Kryeministrit janë të qarta. Shefi i Zyrës për Veteranët e Luftës së UÇK’së në Zyrën e Kryeministrit, Faik Fazliu, flet për Express.
Express: Cila është këshilla juaj për veteranët, të cilët do të dalin për të protestuar me kërkesë për pranimin e familjarëve të tyre në Universitetin e Prishtinës?
F. Fazliu: Nuk kam ndonjë këshillë, por ne si Zyra e Kryeministrit jemi duke punuar me procesin e verifikimit të veteranëve të UÇK’së dhe jemi në fund. Kam qenë në njohuri se ka ekzistuar një njohuri mes UP’së dhe këtyre kategorive. Por, gjithsesi organet e shoqatave të dala nga lufta, gjithsesi, mendoj se duhet të jenë gjithë të matur dhe duhet që kërkesat dhe të drejtat e këtyre kategorive të realizohen në bazë të ligjit dhe asaj që iu takon.
Express: Rrjedhimisht, sipas jush, duhet të respektohet Memorandumi dhe të pranohen ata njëmijë studentë në UP?
F. Fazliu: Nuk po e them këtë e as atë, sepse nuk është çështje që na takon neve. Këto janë çështje që janë mes shoqatave dhe Rektoratit. Ju e dini edhe qëndrimin e Ministrisë së Arsimit dhe Kryeministri ka kërkuar që këto çështje të zgjidhen në mënyrë institucionale dhe të mos ketë përplasje ose trazira në mënyrë që të kërkohet një zgjidhje e drejtë. Personalisht, nuk kisha dashur të bëhem pjesë e asnjërës palë. Por, gjithsesi do të ishte mirë që vendimet e organeve të shoqatave të dala nga lufta të jenë vendime të arsyeshme.
Express: A është gabim nëse ata dalin dhe protestojnë dhunshëm para Rektoratit?
F. Fazliu: Kjo nuk është pyetje që më takon mua të përgjigjem dhe nuk dua të përgjigjem në këtë pyetje. Për këtë mund të flisni me shoqatat e dala nga lufta.
Express: Sipas jush, a duhet të qartësohet gjithë kjo situatë pasi ata njëmijë studentë po presin të nisin studimet?
F. Fazliu: Mendoj se kjo duhet të qartësohet, por ju nuk e keni thirrur njeriun e duhur për të folur për këtë temë.