Sot pritet të nënshkruhet marrëveshja mes dy liderëve partiakë në orën 10:00, kurse në orën 12:00 mbahet seanca konstituive, ku edhe pritet formimi i institucioneve, gjashtë muaj pas bllokadës.
Isa Mustafa përfundimisht do të jetë kandidat për kryeministër të Kosovës, derisa kreu i PDK-së Hashim Thaçi, zëvendëskryeministër dhe ministër i Punëve të Jashtme.
Thaçit i është premtuar nga LDK-ja se do të ketë përkrahjen për president të Kosovës pas një viti e gjysmë, kur t’i kalojë mandati Jahjagës, në vitin 2016, shkruan “Zëri”.
Burime të gazetës “Zëri”, nga të dyja partitë kanë konfirmuar se këto pozita janë të sigurta për krerët e partive të tyre.
Kurse, ish-shefi i SHIK-ut, Kadri Veseli, pritet të emërohet kandidat për kryeparlamentar.
“Zëri” ka mësuar se në takimin e dy liderëve, kreu i LDK-së, Isa Mustafa, ka kërkuar që përveç postit të kryeministrit, kësaj partie t’i takojë me çdo kusht edhe Ministria e Punëve të Brendshme.
Kësaj partie do t’i takojë edhe posti i një zëvendëskryeministri, ndërsa ministritë e tjera që LDK-ja do t’i marrë janë: Ministria e Financave, Ministria e Tregtisë dhe Industrisë, Ministria e Infrastrukturës, Ministria e Shëndetësisë, Ministria e Forcës së Sigurisë, Ministria e Kulturës, Rinisë dhe Sporteve dhe ajo e Diasporës.
Nga ana tjetër, jozyrtarisht nga PDK-ja kanë thënë për “Zërin”, se ata do të marrin një zëvendëskryeministër dhe këto dikaster: Ministria e Punëve të Jashtme, Ministria e Integrimeve Evropiane, Ministria e Zhvillimit Ekonomik, Ministria e Arsimit, Ministria e Drejtësisë, Ministria e Bujqësisë, Pylltarisë dhe Zhvillimit Rural, Ministria e Punës dhe Mirëqenies Sociale si dhe ajo e Ambientit dhe Planifikimit Hapësinor.
Kurse, minoriteteve mund t’iu jepen Ministria për Kthim dhe Minoritete, Ministria e Administrimit të Pushtetit Lokal dhe e Mirëqenies, si dhe Ministria e Administratës Publike