Javët e fundit, komuna e Prizrenit ka filluar me rrënimin e objekteve që janë në kundërshtim me planin rregullativ të qytetit. Rrënimet kanë filluar në lagjen “Ortakoll” dhe do të vazhdojnë edhe në lagjet tjera.
Mirëpo, me këto rrënime nuk janë pajtuar banorët e kësaj lagjeje. Ata kanë thënë se me këto rrënime, komuna ua ka dëmtuar bizneset, edhe pse banorët kishin kërkuar afat deri në pranverë që të rregullojnë këtë problem, raporton KTV.
Derisa Shadan Shasivari ka pohuar se në momentin e rrënimit të një pjese të shtëpisë, janë keqtrajtuar nga Policia e Kosovës.
Në mbrojtje të qytetarëve dhe të qytetit, kanë dalë edhe aktivistë të “EC Ma Ndryshe”. Elmedina Baxhaku ka deklaruar se komuna ka bërë përzgjedhje të rrënimeve.
Mirëpo, këto vlerësime i ka mohuar Bedri Bytyqi, drejtor i Inspektoratit në Komunës së Prizrenit.
“Ne nuk i kemi dëmtuar bizneset sepse prona është pronë publike dhe ne vetëm kemi larguar anekse të objekteve nga prona publike e komunës së Prizrenit”, ka thënë Bytyqi, duke theksuar se rrënimet do të vazhdojnë edhe në lagje të tjera.