Libri “Fjalori rimor i Dritëro Agollit” me autor Mina Geron, pas promovimit të një ditë më parë në Shkodër, është promovuar dje edhe në Tiranë nga shtëpia botuese “Toena”. Autori i librit Mina Gero është shprehur se tek vargu i poetit Dritëro Agolli ka mundur të vërejë “edhe të fshehtat e nivelit fonetik, lojën me tingullin dhe grupet e tyre, alternimet që bën poezia për t’u ngritur në lartësinë e shprehjes”.Për Fjalorin rimor… “ të poetit, Mina Gero është shprehur se e ka kaluar në filtrin gjuhësor, ndërsa shkrimtari Dritëro Agolli ka bërë thirrje dje se gjuha shqipe duhet të mbrohet nga fjalët e huaja dhe duhet ruajtur.
Agolli ka folur gjatë promovimit të librit se “Nëse vazhdohet kështu, besoj që duhet të kemi një fjalor ta lexoj këtë lloj shqipeje, nëse ndonjëri do të jetojë 100, apo 150 vjet, sepse është bërë përshesh. Po të dalësh në pazare e të numërosh dyqanet janë plot me fjalë të huaja…, po veri emrin e një mali, një lumi….E kam fjalën që gjuha shqipe duhet ruajtur”, tha ndër të tjera Dritëro Agolli.
Duke u ndalur tek poezia, Dritëroi tha se edhe poezia ka ndryshuar, nuk mund të themi se shkruajnë të gjithë me rimë, madje rima është rralluar, tani e domosdoshme në poezi është muzika, se ajo plotëson edhe rimën”.
Mes të tjerash shkrimtari shtoi se “edhe pse poezia ka ndryshuar, ka edhe poetë që shkruajnë me rimë, dhe që kanë marrë edhe çmime nobel”.
Fjalori rimor i studiuar nga Gero përmes pasurinë rimore të poezisë së Dritëro Agollit, pasqyron pasurinë gjuhësore që është hedhur në përdorim në funksion të rimës.