Të organizuar nga kryetari i Prizrenit, Ramadan Muja, sot është mbajtur një akademi komemorative, me rastin e vdekjes së mjekut të mirënjohur, Ymer Koçinaj.
Pjesë e këtij tubimi në përkujtim të jetës dhe veprës së të ndjerit, Ymer Koçinaj, ishin familjarë, miq dhe bashkëpunëtorë të të ndjerit, si dhe zyrtarë të institucioneve të ndryshme lokale.
Duke folur për jetën dhe veprën e profesor Ymerit, kryetari i komunës, Ramadan Muja, tha se i ndjeri gjatë gjithë jetës së tij ka qenë shembull i një punëtori të palodhur për shërbim cilësorë dhe një shkencëtar i madh në zhvillimin e shëndetësisë në Kosovë.
Ndërkaq, bashkëpunëtorët e të ndjerit dhe drejtori i spitalit të Prizrenit, Afrim Avdaj, e vlerësuan lartë figurën e Ymer Koçinajt për kontributin e tij në zhvillimin e këti sektori të rëndësishëm në vendin tonë.
Për organizimin e këtij tubimi, në emër të familjes, falënderoi djali i të ndjerit, Dardan Koçinaj.
Ndryshe, prof. Dr. Ymer Koçinaj kishte ndërruar jetë në moshën 82 vjeçare ditën e shtunë, ndërsa të nesërmen me nderime të larta ai ishte varrosur në varrezat e vendlindjes së tij, në fshatin Vërmicë. /TV Prizreni