Policia e Kosovës sapo ka arrestuar pronarin e restorantit “Koha”, Burim Sallauka, për rrahjen e punëtorit të tij, ka mësuar Gazeta Insajderi. Arrestimi i tij është kryer me urdhër të Prokurorisë së Prizrenit.
Insajderi ka siguruar videon e sulmit fizik, në të cilën shihet biznesmeni Sallauka [i veshur me bluzë ngjyrë hiri] teksa thërret pranë tij punëtorin e tij, kamarier i restorantit, dhe e godet me grushte.
Sulmin fizik ndaj kamarierit të restorantit që ai menaxhon, Sallauka e vazhdon edhe në një hapësirë tjetër të restorantit, të pa incizuar nga kamerat.
I telefonuar nga Insajderi, Sallauka ka mohuar ta ketë kryer sulmin, ndonëse në video shihet ai teksa grushton punëtorin e biznesit të tij.
“Nuk e kam sulmu unë askënd. Nuk e di se as për çfarë sulmi je duke fol”, ka thënë fillimisht Sallauka. “Për çfarë video bëhet fjalë?”, ka pyetur ai.
“Nuk është e vërtetë, unë qe një javë jam në Prevallë. Nuk ka asgjë [të vërtetë]”, ka thënë Sallauka. “Nuk është e vërtetë a është e vërtetë… ju mos më qitni. Emrin tim mos e qit, nuk është e vërtetë ajo”.
Ndërsa Inspektorati i Punës nuk është i informuar lidhur me sulmin fizik që i ka bërë pronari i një restoranti në Prizren njërit prej punëtorëve të tij në ambientet e restorantit para disa muajsh.
Basri Ibrahimi, kryeinspektor i Inspektoratit të Punës, ka thënë për Gazetën Insajderi se nuk është në dijeni lidhur me këtë rasti. Ai është arsyetuar se ka shumë ankesa dhe nuk është Ajnshtajnë me i ditë të gjitha.
“Nuk kam informata nëse ka pas ankesë në inspektorat të punës sepse tashmë ajo është çështje e policisë nuk është më çështje e inspektoratit. Nëpër krejt regjionet çka vinë ankesat shansa nuk kam me ditë sepse vetëm këtë vit i kem pas 1 mijë ankesa, unë Ajnshtajn nuk jam me i mbajt në mend këto sene”, ka thënë Ibrahimi.
Ibrahimi ka shtuar se kjo çështje i përket aspektit ligjorë dhe është vepër penale dhje nuk ka të bëjë me detyrat e kushteve të punës.
“Kjo është çështje e organeve të drejtësisë sepse është vepër penale, nuk është më me detyrat e punës ose me kushteve të punës, mirëpo është vepër penale, sulm fizik ndaj punëtorit”, ka shtuar Ibrahimi. /Insajderi.com
.