Në shumicën e fshatrave të Gorës, për shkak të mosgjetjes së një gjuhe komunikimi me banorët, situata vazhdon të paraqitet mjaft e rëndë sa i përket pastrimit të ambientit, shkruan Koha Ditore.
Kjo gjendje është më e theksuar tani kur shumë bashkatdhetarë janë kthyer në pushime. Pothuajse nuk ka fshat në këtë trevë, në afërsi të të cilëve nuk vërehen grumbuj të mëdhenj plehrash, për pastrimin e të cilave nuk përkujdeset askush. E keqja më e madhe qëndron në faktin se mbeturinat hidhen në afërsi të lumenjve të këtyre fshatrave, nga ku banorët furnizohen me ujë të pijshëm.
Kjo dukuri, mjaft e shëmtuar, jo vetëm që ia ka prishur imazhin e kësaj komune, zyrtarët e së cilës me ngulm deklarojnë se është njëra prej komunave ekologjikisht më të pastra në Kosovë, por edhe rrezikon seriozisht shëndetin a banorëve. Situata më e vështirë vazhdon të paraqitet në afërsi të fshatrave më të mëdha të kësaj treve, si në Restelicë, Brod, Kukajan, Radeshë, Glloboqicë e Krushe.