Bashkimi e ka fituar edhe ndeshjen e tretë gjysmëfinale të play-off-it në IP Superligën e Kosovës ndaj Rahovecit dhe e ka siguruar kualifikimin në finale.
Pas dy fitoreve bindëse në “Sezai Surroi”, prizrenasit kanë vazhduar në të njëtën mënyrë edhe në ndeshjen e tretë, e cila u zhvillua në Gjakovë, ku fituan me shifrat 106:91. “Portokallinjtë” kanë dominuar gjatë gjithë kohës dhe fitorja e tyre nuk erdhi në dyshim për asnjë moment.
Mikaile Tmusic me 32 pikë ishte kreator i fitores së Bashkimit, ndërsa në masë të madhe u ndihmua edhe nga Eric Stutz (21), Aaron Moss (16) e Vincent Zollo, i cili kontribuoi me 13 pikë.
Në anën tjetër, te “Vreshtarët” më efikasi ishte Muhamed Hasani me 19 pikë, Mark Williams i shtoi 15, ndërsa Arti Hajdari 12 sosh. Bashkimi në finale e pret fituesin e çiftit Sigal Prishtina – Golden Eagle Ylli (kryeqytetasit udhëheqin me 2:0), ndërsa për Rahovecin ka përfunduar edicioni, që gjithsesi ishte historik.