Karim Benzema është dënuar me një vit burg me kusht, pasi u shpall fajtor si bashkëpunëtor në tentativën e shantazhit të ish-bashkëlojtarit të tij në Francë, Mathieu Valbuena.
Gjykata e Versajës urdhëroi gjithashtu yllin e Real Madridit të paguajë një gjobë prej 75,000 eurosh për përfshirjen e tij në skandalin e kasetave seksuale që rezultoi me pezullimin e Benzema-s nga kombëtarja franceze për disa vite.
Ndërkohë, Noel Le Graet, presidenti aktual i Federatës Franceze të Futbollit, e bëri të qartë tre javë më parë se vendimi i gjykatës nuk do të ndikonte në karrierën e Benzema-s me Francën.
Kjo do të thotë se pavarësisht se është shpallur fajtor, sulmuesi i Real Madridit do të marrë pjesë në Kupën e Botës 2022 në Katar me Francën.
Benzema u thirr për të marrë pjesë në Kampionatin Evropian të verës së kaluar dhe ai ka shënuar nëntë gola në 11 ndeshje zyrtare që nga rikthimi i tij në kombëtare.
Mbrojtja e sulmuesit të Real Madrid këmbënguli në gjykatë se ai nuk kishte ndërmend të shantazhonte Valbuenën, pasi dyshohet se u përpoq të ndihmonte ish-bashkëlojtarin e tij në Francë.
Prokuroria kërkoi dënimin më të ulët të burgut ndaj Benzema-s, por gjobën më të lartë të mundshme.
/Albanianpost.com
