Kryetari aktual i komunës së Prizrenit, Ramadan Muja, njëherësh edhe kandidat i Partisë Demokratike të Kosovës (PDK), ka munguar në debatin e zhvilluar në Radio Televizionin 21 (RTV 21), për të parin e Prizrenit.
Mungesën e Ramadan Mujës në debatin e sontëm, kandidati i BD-së, Zafir Berisha, e ka cilësuar si gjest jo burrëror.
Berisha ndër të tjera ka deklaruar se abuzimi i cili është bërë në të kaluarën, me vjedhjen e votës, e bën normale bartjen e armëve nëpër qytet.
“Jeni duke mendu që në Suedi jeni duke organizuar zgjedhjet. Kur je i detyruar duhet të bartet arma”, ka theksuar Berisha.
Kandidatët për të parin e Prizrenit, për zgjedhjet lokale të 3 nëntorit, kanë premtuar zhvillimin e aspektit kulturor dhe historik të Prizrenit,transmeton Telegrafi
Kandidati i Lidhjes Demokratike të Kosovës (LDK), Eqrem Kryeziu, ka premtuar se do të zgjidh problemin e ujit të pijes në Prizren.
“Në kohën kur unë kam qenë kryetar i Prizrenit, qyteti nuk ka vuajtur për ujin e pijes. Sado qe te zgjerohet Prizreni, unë premtoj se Prizreni nuk do të ketë problem me ujin e pijes”, ka pohuar Kryeziu.