Botohet në rumanisht libri i ambasadorit shqiptarë në Kosovë, Islam Lauka “Kosova rast universal apo sui generis”. Pas botimit në anglisht dhe në arabisht, këto ditë, u botua edhe në rumanisht libri i Laukës.
Botimi në këtë gjuhë u mundësua nga familja me origjinë shqiptare Susli.
Promovimi i librit u organizua në kryeqytetin rumun, Bukuresht, nga “Fondacioni Europian Titulescu” ( FET). Në këtë veprimtari ishin të pranishëm anëtarë të trupit diplomatik, të akredituar në Bukuresht, deputetë, akademikë, studiues dhe ekspertë të së drejtës dhe marrëdhënieve ndërkombëtare, përfaqësues të mediave, si dhe bashkatdhetarë me qëndrim në Rumani.
Midis atyre që morën fjalën në këtë veprimtari ishin edhe Oana Popescu, drejtore e “Global Focus Centre”, Vasile Simileanu, drejtor i revistës “Gjeopolitika”, Ion Diaconu, publicisti i njohur, njëkohësisht përkthyes i librit, Tiberius Puiu.
Presidenti i “FET”, ish kryeministër i Rumanisë, Adrian Nastase, i cili ishte moderator i aktivitetit, duke e përmbyllur atë, theksoi se Rumania duhet ta njohë shtetin e Kosovës. Duke u shprehur figurativisht, ai tha se “Është fjala për lindjen e një fëmije. Ai ka lindur tashmë, është pagëzuar dhe është fqinj me ne. Pavarësisht se na pëlqejnë ose jo prindërit e tij, ne duhet ta njohim atë”.
Në këtë veprimtari ishte i pranishëm edhe Ambasadori i Shqipërisë në Rumani, Sami Shiba.