Agim Muhaxheri
Intervista e imamit të Xhamisë së Madhe në Prishtinë, dr. Shefqet Krasniqit, zgjati disa orë. Ai lirohet. Nëse për ndokënd ka prova e fakte juridike se ka kryer vepër penale, shteti nuk ia fal mëkatin. Lajmi se Flora (Brovina) i ka tubuar të vetët (PDK), mbeti nën hije. Adem “Shtriga” më thotë: Shkruje një hajmali në gazetë, nashta ju ban hajr politikanëve që s’po mund të merren vesh…”
Vala e arrestimeve po vazhdon.
Quo vadis Kosova?
Policia e prokurorët kanë shumë punë. Po përballen me lëndë “shumë të ndjeshme”.
Të “ndjeshme” janë për njerëzit e rëndomtë, ndërsa për njerëzit e shtetit, policinë dhe prokurorinë, janë ‘raste të zakonshme”.
Lëndët me të cilat merren janë ato që kanë të bëjnë me veprën penale të terrorizmit, nxitjes në terrorizëm, urrejtjes kombëtare, fetare, racore…
Kjo bie në domenin e veprave penale politike.
Prokurorët s’bën të heshtin.
Prokurorët identifikojnë shtetin
Kur shteti hesht, krijohet imazh i keq për shtetin.
Shteti s’bën të hesht, assesi, në asnjë mënyrë.
Ndryshe, krijohet imazhi i keq për shtetin.
Serbia armike së bashku me vëllezërit e saj arabë investon, jep para të majme për ata që po e bëjnë luftën në Siri dhe Irak.
Nuk i dhimbsen paratë Serbisë për të krijuar imazhin e keq për Kosovën.
Ajo (Serbia) për procesin e 40 të dyshuarve dhe të tjerëve që iu bashkëngjitën këtij numri i fërkon duart.
Thotë: Financimi s’po më shkon huq.
Prerja e kokave të njerëzve, pra edhe e dy gazetarëve amerikanë ishte rrëqethëse. Ata që janë të sëmurë nga zemra, këto skena nuk bën t’i shikojnë.
Dhe ata që e quajnë veten myslimanë, jo shqiptarë, iu bashkuan ISIS-it dhe Al Nusra-s, u bënë bashkë me ta.
E pjesëtarët e ISIS-it dhe të Al Nusras i quajnë ushtarët e djallit.
Të bëhesh bashkë me ushtarët e djallit, kjo është tmerr.
E enjtja e 4 shtatorit, ishte ditë e “nxehtë” në Kosovë. Pati arrestime, bastisje dhe vlime në politikë. Shpërtheu si raketë lajmi: Brenda grilave mbahet dr. Shefqet Krasniqi, imami i Xhamisë së Madhe në Prishtinë.
Lajmi i dytë, kryesuesja e Kuvendit Flora Brovina u konsultua me të vetët (PDK-në) për rrjedhën e seancës së ardhshme për konstituimin e Kuvendit, që u caktua më 12 shtator.
Lajmi i madh e gëlltit të voglin. Politika mbeti nën hije. Lajmi i “dorës së parë” është ai i arrestimit të teologut Shefqet Krasniqit.
Po ashtu, si raketë shpërtheu lajmi në portalet tona. Tribuna online lajmin e titullon: “Shefqet Krasniqi lirohet?”. Pastaj i heq pikëpyetjen. Del lajmi i vërtetë.
Krasniqin e arrestuan në orët e hershme të mëngjesit, të 4 shtatorit, pasi kishte falur namazin e sabahut. E bastisën shtëpinë e tij. Portalet shkruan se prokurorët me të po bëjnë intervistë. Zëdhënësi i Bashkësisë Islame të Kosovës, Ahmet Sadriu, për Radio Kosovën u shpreh se BIK do të jetë përkrah institucioneve të vendit.
Natyrisht, e përmendën shprehjen “përkrahës të institucioneve të Kosovës”, se ndryshe s’bën, bëhet bërlloku.
Di BIK-u të bëjë politikë!
Kur policia të bastisë shtëpinë, të arreston, nuk të thirrë për intervistë, por një veprim i tillë është serioz dhe ka të bëjë me masën e mbajtjes apo të paraburgimit.
BIK-u shpreh habinë se përse, kur është arrestuar doktor Shefqet Krasniqi, nuk është bërë me dije ky institucion fetar.
Nuk bën të shpreh habinë.
Policia nuk ka obligim ligjor ta lajmërojë BIK-un, po familjen e të dyshuarit. Kjo është rregull ligjore që vlen jo vetëm te ne, po çdo kund, aty ku ka sistem të mirëfilltë juridik.
Andaj, zotërinj të BIK-ut, mos u hidhëroni për këtë “kabahat”.
Masa e mbajtjes mund të zgjasë deri në 48 orë, ndërsa paraburgimin, nëse ka arsye për këtë, me propozimin e prokurorit e cakton gjykatësi i procedurës paraprake.
Policia e Kosovës përmes një njoftimi zyrtar ka treguar se ka shoqëruar Shefqet Krasniqin, si të dyshuar për veprën penale “nxitje e urrejtjes, përçarje ose mosdurim kombëtar, racor, fetar apo etnik”, sipas nenit 147 të KPK-së.
Jorastësisht nuk u arrestua imami Krasniqi, ngase ky dhe dy të tjerë janë në listën e zezë të Departamentit Amerikan të Shtetit.
Megjithëkëtë, prokurorët e gjykatësit s’bën të kenë paragjykime.
Ata s’bën të jenë emocionalë. Kanë prova, nëse i kanë, e bëjnë procedurën penale!
Neni 3 i Kodit tonë të procedurës penale (2013) është i titulluar:
Prezumimi i pafajësisë së të pandehurit dhe in dubio pro reo. Në paragrafin 1 të këtij neni thuhet:
Çdo person i dyshuar ose që akuzohet për vepër penale konsiderohet i pafajshëm derisa të vërtetohet fajësia e tij me aktgjykim të formës së prerë të gjykatës.
Andaj, askush, pra as shtypi, as televizioni, as radioja nuk ka të drejtë dikë ta quajë kriminel, t’i japë epitetin e xhihadistit….
Imami Krasniqi dyshohet për “nxitje e urrejtjes, përçarje ose mosdurim kombëtar, racor, fetar apo etnik”. Nëse ka prova se ai ka hyrë në zonën kriminale, shteti nuk ia fal. Për këtë vepër penale dënimi është paraparë prej 5 deri në 10 vjet burg.
Një ditë para furtunës, në një kafiteri bashkëvendësi im Adem Zeneli, të cilin e thërrasin Adem Shtriga, i shoqëruar me tezakun e tij Nuhiun, “gjermanin”, i zhgënjyer për tërë atë se ç’po ngjet me politikën tonë, për politikanët që s’po mund të merren vesh, më thotë: “Shkruje një hajmali në gazetë, mos po u bënë hajr”. Njëri ia tërhoqi vërejtjen: O Adem Shtriga, mos hyn në politikë…
E pinim kafen e mëngjesit në njërën nga kafiteritë e Kaçanikut. Me mikun e kolegun tim, Ekrem Rakën. Shikonim në TV dhe lexonim titrat për arrestimin e Shefqet Krasniqit. Në njërën nga tavolinat dëgjoj zërat “A more vesh, Shefkija i agës… e kish hek mjekrën… Tanë kanë me i hek mjekrat, mjekrat e vehabistëve…”. Njëri tha: E mjekrat e artistëve a do t’i heqin?
E di shteti mjekrat e kujt i heq!
Më la përshtypje edhe opinioni i shkrimtarit dhe studiuesit të letërsisë Ag Apollonit, autorit të romanit “Ulurimë e ujkut”. Opinioni i tij në Facebook është: “Dikur luftonim për Spanjën, tash për Sirinë. Epo, kështu do ta bëjmë Shqipërinë”.
Nipi im Nazmiu (Kelmendi), ish-pjesëtar i Ushtrisë Çlirimtare të Kosovës, luftëtar në Pashtrik e Koshare, i njohur si Komandanti i Trentë, më thotë: O dajë nuk ndihem mirë kur dëgjoj e lexoj se si disa “luftëtarë” e njollosin UÇK-në, më vjen marre t’i them dikujt se kam qenë ushtar i UÇK-së. Ndaj atyre që e njollosin kombin tonë, ndaj atyre që e shajnë mikun tonë Amerikën, ndaj atyre që bëhen bashkë me ISIS-in dhe Al Nusran, shteti ynë duhet të jetë i pamëshirshëm. Me u vetë unë, thotë ai, këta që po luftojnë në krah me këto organizata terroriste i kisha fshi prej faqes së dheut…