Të hënën, në Dhomat e Specializuara të Kosovës, me seli në Hagë, ka filluar gjykimi ndaj Hashim Thaçit, Kadri Veselit, Jakup Krasniqit dhe Rexhep Selimit, e të cilët janë deklaruar të pafajshëm.
Pas leximit te aktakuzës së ndryshuar nga ana e ZPS-së, të akuzuarit Thaçi, Veseli, Selimi dhe Krasniqi u deklaruan te pafajshëm për veprat penale që u vihen barrë, raporton ‘‘Betimi për Drejtësi’’.
“E kuptoj, jam plotësisht i pafajshëm”, tha Thaçi.
Tutje, Veseli tha se e kupton aktakuzën e ndryshuar, dhe shprehi pa kënaqësi për vonesën prej 2 viteve nga deklarimi i tij I fundit.
“Po gjithsesi, shpreh pakënaqësinë time për një vonesë të tillë 2 vjeçare, megjithatë ju falënderoj”, tha ai.
Po ashtu, Selimi tha se është i pafajshëm për të gjitha pikat e akuzës.
“Jam i pafajshëm në të gjitha pikat e akuzës”, tha Selimi.
Ndërkaq, Krasniqi para deklarimit të tij tha se nuk ka lidhje me asnjërën pikë të aktakuzës dhe se nuk ndjehet fajtorë.
“Unë e kam të vështirë që ta kuptoj akuzën dhe mënyrën se si është përpiluar kjo akuzë, unë nuk kam asnjë lidhje me asnjërën nga pikat që i lexoj prokurorja”, tha Krasniqi.
Ai tutje shtoi se aktakuzën e kupton por nuk pajtohet me të pasi që nuk mban asnjë përgjegjësi për të cilën flet aktakuza.
“Jam tërësisht i pafajshëm”, ka shtuar Krasniqi.
Ata sërish kanë konfirmuar deklarimin e tyre para gjykatësit paraprak, ku kishte deklaruar se janë të pafajshëm.
Më pas, të njëjtit u informuan me të drejtat që i gëzon në gjykatë në zbatim me kornizën ligjore.