Deputetja italiane e Forza Italia-s, Michaela Biancofiore është sulmuar në orën 01:00 të natës në qendër të Romës ndërsa kishte nxjerrë për shëtitje qenin e saj.
Deputetja, megjithatë ka arritur t’i shpëtojë grabitësit, një 22-vjeçar nga Sudani, i cili është arrestuar nga një patrullë karabinierësh që po kalonte rastësisht aty.
Sipas shtypit italian, gruaja po kalonte në rrugën “Nazionale” me qenin e saj, kur ka kuptuar se dikush po e ndiqte. Në pak minuta, pati një përpjekje për ta grabitur: deputetja është përplasur në një mur pak metra larg Quirinale-s. Por Biancofiore ka reaguar dhe pasi e ka shtyrë agresorin, ka ndaluar për të njoftuar një patrullë karabinierësh.
Grabitësi është identifikuar menjëherë nga forcat e rendit. Bëhet fjalë për Mohamed Atiols, një 22-vjeçar nga Sudani. “Tipi klasik që nuk ka të drejtë për azil, – ka shpjeguar deputetja. – Një nga 600 mijë azilantët që duhen dëbuar. Shpresoj që qeveria e ardhshme me koalicion legist të mbajë premtimet”.
Deputetja ka treguar në fund se kishte pasur frikë, “por, -saktëson, – më shumë se dhuna fizike, i shoh të padenja fyerjet në ueb ndaj meje vetëm pse thashë që Jugu (i Italisë) është më i varfër se Veriu”, – thotë ajo, duke iu referuar një ndërhyrjeje televizive të disa ditëve më parë.