Festivali i filmit dokumentar dhe të shkurtër “DokuFest”, të premten, ka shpallur programin e plotë të filmave që do të projektohen në edicionin XIII, që sivjet mbahet nga 16 deri më 24 gusht.
Sipas drejtuesve të kësaj ngjarjeje kulturore, nga 2 mijë e 400 filma që kanë aplikuar, festivali ka përzgjedhur që të shfaqë 237 filma nga 56 vende të ndryshme të botës, në kuadër të gjashtë programeve garuese dhe shumë programeve të tjera speciale.
Drejtori artistik i “DokuFestit”, Veton Nurkollari, ka shprehur bindjen se përmbajtja e këtij programi do të ngjallë ndjenja të ndryshme te publiku, që do të kenë rastin të ndjekin rrëfime të treguara përmes objektivit të kamerës mbi njerëzit dhe fatet e tyre, ngjarjet e përditshmërisë në glob si dhe zhvillimet në raport me natyrën apo edhe me teknologjinë moderne, shkruan sot Koha Ditore në shtojcën Koha për Kulturë.