Del në sallat e kinemasë nga 24 deri në 28 prill dokumentari “Whitney”, mbi jetën e një prej zërave më me ndikim dhe ikonikë të historisë së muzikës: Whitney Houston.
Pesë vjet nga vdekja, në 11 shkurt 2012, filmi i shpërndarë nga “Eagle” do të lejojë të rijetojë të gjitha etapat e një suksesi të madh dhe të gjitha fazat e një jete të mbushur me dashuri, skandale dhe eksese deri në epilogun tragjik të një gruaje të fortë, por në të njëjtën kohë edhe shumë të dobët.
I përbërë nga materiale të papublikuara më parë, mes të cilave skena të jetës së përditshme të Whitney dhe familjarëve të saj, intervista të kolegëve dhe miqve, të alternuara me sekuencat më të bukura të koncerteve të saj, Whitney bën të mundur njohjen më mirë të këtij ylli të madh e të ndritshëm, që shkoi pak nga pak duke humbur dritën vitet e fundit.
Regjisori Nick Broomfield, në fakt, ka deklaruar se ka hetuar në thellësi të jetës së Whitneyt për t’i kuptuar arsyet, të cilat nga një sukses i madh yjor e çuan në një rënie pikëlluese artistike dhe personale.
“BBC”-ja e ka realizuar dokumentarin duke ia besuar punën Nick Broomfield, regjisor anglez, i njohur për kapacitetin për të rrëmuar në jetën e artistëve më të famshëm e që u bë i njohur për dokumentarin e një tjetër ikone të muzikës si Kurt Cobain.
Whitney Houston ishte një nga artistet femërore të një suksesi të madh dhe në karrierën e saj ka thyer shumë rekorde dhe u ngjit në klasifikime vit pas viti.