Gazeta Mapo zbardh sot dosjen e prokurorisë për dy kushërinjtë Klodian dhe Gazmir Gjozi, të cilët akuzohen për vrasjen e bankierit Artan Santo.
Ndër të tjera në këtë dosje thuhet se në duart e të dyshuarve janë gjendur gjurmë baruti.
“Në dy shiritat ngjitës të etiketuar për secilën dorë të shtetasit Klodian Gjozi, u evidentua prania e nitriteve dhe nitrateve, të cilat janë të pranishme edhe tek mbetje të qitjes me armë zjarri me prejardhje nga barutet”,- thuhet në akt- ekspertim.
Mirëpo dy të ndaluarit e kanë mohuar që të kenë lidhje me këtë ngjarje apo që të kenë qëlluar me armë.
“Kemi qenë duke punuar tokën deri kur ka ardhur policia e zonës dhe ka thënë se do të paraqiteshim në polici bashkë me Klodianin për të dhënë shpjegime. Kemi hipur në makinën time dhe jemi nisur për në shtëpi për t’u ndërruar. Gjatë rrugës na ndaloi policia dhe na shoqëroi”,- thotë në dëshminë e tij shtetasi Gazmir Gjozi.
Policia ka gjithashtu dyshime se edhe motori i dy kushërinjve është i ngjashëm me atë të vrasësve të Santos, ndërkohë që ky mjet u gjet në një servis afër Rinasit. Prokuroria po heton edhe në pista të tjera, kryesisht që kanë lidhje me aktivitetin bankar të Artan Santos.
Në media, madje edhe në parlament është përfolur pista e lidhjes së mundshme të bankës së Santos me sasinë e drogës së kapur në Mal të Zi në fillim të muajit qershor