Në ambientet e Institutit Yunus Emre në Prizren u bë hapja e ekspozitës me punimet e realizuara në kuadër të Kurseve të Aftësimit Profesional, të organizuara nga Komuna e Prizrenit me mbështetjen e Agjencisë Turke për Bashkëpunim dhe Koordinim (TIKA) dhe Qendrës së Kurseve të Aftësimit Profesional në Komunën e Konyas (KOMEK).
Në këtë ekspozitë u prezantuan punimet artizanale të punuara në pesë kurset e Veshjes, Qëndisjes me rruza në gjergjef, Pajisjeve shtëpiake (dyshekë, peshqirë, shtroje, mbulesa, piceta duarsh, mësalla tryeze, paje nusesh etj), Djegie në Dru (Pyrography) dhe Reliev në letër.
Në hapjen e ekspozitës i pranishëm ishte edhe kryetari i Komunës së Prizrenit Mytaher Haskuka, i cili theksoi rëndësinë e përfitimit të aftësive profesionale dhe artizanale si në zhvillimin individual të pjesëmarrësve të kursit, ashtu edhe në zhvillim shoqëror dhe ekonomik të vendit.
Gjatë kësaj ekspozite u shpërndanë edhe certifikatat për pjesëmarrësit e kurseve, që zgjatën rreth 4 muaj.
