Kryetari i Komunës së Prizrenit, Mytaher Haskuka, ka paralajmëruar se javën e ardhshme do të formohet Qeveria lokale. Ajo, sipas tij, do të përbëhet nga një koalicion i gjerë i subjekteve politike.
Ai ka theksuar se ky bashkim i forcave politike është i nevojshëm, me qëllim të ndryshimit të madh në Prizren, përkatësisht kthimin e Komunës tek qytetarët, shkruan sot “Koha Ditore”.
Ndërkohë kryesia e Degës së LDK-së në Prizren ka miratuar vendimin për hyrje në koalicion me Lëvizjen Vetëvendosje dhe ka autorizuar përfaqësuesit e saj që ta konkretizojnë marrëveshjen.
Gatishmërinë për të qenë pjesë e koalicionit të gjerë e kanë shprehur edhe përfaqësues të partive të komuniteteve joshumicë.
Në një adresim për qytetarët e Komunës së Prizrenit, kryetari Haskuka ka bërë të ditur se “javën e ardhshme do të konstituohet kryesia e Kuvendit të Komunës si edhe do t’i emërojë drejtorët përgjegjës, prej të cilëve pres angazhim maksimal në mënyrë që t’i zgjidhim problemet emergjente të qytetarëve” …