El Salvadori është shteti i radhës, i cili e ka njohur pavarësinë e Republikës së Kosovës. Lajmin për këtë njohje e ka konfirmuar ministri i Jashtëm i Kosovës (MPJ), Enver Hoxhaj në rrjetin social “Twitter”.
Me këtë rast ministri Hoxhaj ka falënderuar El Salvadorin për konfirmimin e njohjes. “Konsullata e Përgjithshme e Kosovës në Nju Jork ka pranuar njoftimin e El Salvadorit për zyrtarizimin e njohjes së Kosovës. Faleminderit El Salvadorit, Qeverisë dhe popullit të tij”, ka shkruar Hoxhaj në “Twitter”. Pas njohjes së pavarësisë nga Libia, Grenada dhe Tajlanda, El Salvadori është shteti i 105-të që e ka njohur Kosovën si shtet të pavarur dhe sovran.