Komandanti i Operacioneve Civile të Bashkimit Evropian, Hansjörg Haber ka udhëtuar për në Kosovë me rastin e vdekjes së pjesëtarit të EULEX-it Audrius Šenavi?ius, i cili u vra dje në Kosovën veriore. Hansjörg Haber, i shoqëruar nga Shefi i Misionit EULEX, Bernd Borchardt, iu drejtua personelit të EULEX-it në Mitrovicë dhe Prishtinë.
Në fillim të takimit në Selinë Qendrore të EULEX-it në ish-Farmed, personeli i EULEX-it, Borchardt dhe Haber, mbajti një minutë heshtje në nderim të Audriusit.
Gjatë fjalimit të tij para personelit, Haber tha: “Erdha sot në Kosovë që bashkë me ju ta shpreh solidaritetin, dhimbjen dhe përkujtimin për kolegun e rënë Audrius Šenavi?iusit. Kjo është një ngjarje tragjike dhe është e rëndësishme që ta dini se ju vlerësoheni dhe mbështeteni nga nivelet më të larta të udhëheqjes në Bruksel. Jam i bindur se policia dhe stafi ynë i gjyqësorit, në bashkëpunim me Policinë dhe institucionet gjyqësore të Kosovës do t’i bëjnë hetime të hollësishme për këtë ngjarje tragjike që ndodhi dje”, transmeton Indeksonline.
Është hapur libri i ngushëllimeve ku kolegët nga EULEX-i dhe zyrtarët e institucioneve të Kosovës, përfaqësuesit e korit diplomatik, përfaqësuesit e organizatave ndërkombëtare mund t’ia shprehin ngushëllimet e tyre familjes së Audriusit. Kryetarja e Kosovës Atifete Jahjaga, Ministri i Punëve të Brendshme Bajram Rexhepi dhe Kryetari i Kuvendit Jakup Krasniqi ishin në mesin e zyrtarëve që u nënshkruan në librin e ngushëllimeve sot.
Audrius ishte zyrtar doganor i EULEX-it, i cili punonte në kuadër të ndërrimeve të rregullta në pikë-kalimet në veri. Ai për herë të parë erdhi dhe punoi në këtë mision gjatë periudhës prill 2010 dhe maj 2011 si Zyrtar i të hyrave doganore, kurse herën e dytë si Zyrtar Doganor prej muajit gusht 2012.
Para ardhjes së tij në misionin EULEX ai ka punuar si Inspektor i Lartë në Departamentin e Doganës së Lituanisë. Audrius ka lënë pas vetes bashkëshorten dhe dy djem.