Artisti kosovar, Fahredin Spahija po e sfidon vetën me fotografë nga e gjithë bota në konkursin e hapur online që tashmë është i hapur dhe do të zgjasë deri më 2 mars. Vetë autori i fotografisë, që në këtë garë po prezantohet me fotografinë e një gruaje të moshuar ka thënë për KultPlus se ky konkurs po organizohet nga portali më i madh i fotogrfaisë në botë “Lens Culture”.
Sipas tij, deri sa të vjen koha që juria profesionale të merret me vlerësimet, kjo garë është në duart e përdoruesve të rrjetit social facebook, ku pëlqimet dhe shpërndarjet e kësaj fotografie mund të shkojnë edhe në favor të artistit në fjalë.
“Portreti me të cilin kam konkurruar në kategorinë: konkurrim me një portret, është realizuar në vitin 2007, gjatë rivarrimit te 12 shqiptarëve të vrarë gjatë luftës së fundit”, ka thënë Spahija për KultPlus.
Sipas tij, në fotografinë që e ka emërtuar “Pain” (Dhembja) është motra e të rivarrosurit Malush Adem Spahiut.
“Me portretin e së cilës jam munduar të përfshijë dhe të paraqesë tërë dhembjen e shqiptarëve për vrasjen dhe zhdukjen e mijëra familjarëve të tyre nga pushtuesi serb gjatë luftës së fundit në Kosovë…”, ka shpjeguar Spahija.
Ndërkohë, juria profesionale është në përbërje edhe të artistëve prestigjioz si: Philipe Prodger, që punon për National Portrait Gallery në Londër, Deborah Dragon, Editore e fotografisë në revistën prestigjioze të Neë Yorkut, Rolling Stone Magazine, Natalie Matutschovsky, editore e fotografisë në TIME Magazine të New Yorkut,…
Ata që duan ta mbështesin këtë artist të Kosovës duhet të ndjekin udhëzimet e linkut të mëposhtëm.
https://www.lensculture.com/portrait-awards-2015