Pavarësisht se i kanë ikur dy deputetë, që kanë një histori me drejtësinë, mazhoranca arriti dje 86 vota, të mjaftueshme për shumicën e cilësuar.
Kjo falë votave të Shpëtim Idrizit, Aqif Rakipit dhe Omer Mamos së PDIU.
Megjithatë brenda PDIU duket se ka ende paqartësi, pasi dy deputetë të kësaj partie ishin një ditë më parë në mbledhjen e partive opozitare.
Ndërkohë pranë Edi Ramës po afrohet edhe Bamir Topi i FRD.
Kryeministri Edi Rama ka arritur në pak ditë që brenda koalicionit të mazhorancës të bindë parti që zgjedhjet e fundit parlamentare patën një mbështetje jo të vogël votash, si PDIU-ja apo edhe FRD-ja, por nuk po gjen ende gjuhen e përbashkët me ato të cilat ai i ka përfshirë në koalicion prej dy vitesh si PDS e Paskal Milos dhe PBDNJ-ja e Vangjel Dules.
Kryeministri Edi Rama po zhvillon negociata intensive me secilën prej partive sa më sipër por ende nuk është gjetur një marrëveshje e përbashkët.
Kështu kreu i Partisë Demokracia Sociale, Paskal Milo është shprehur se Partia Socialiste nuk ka respektuar marrëveshjet parazgjedhore me aleatët.
Ai nuk ka përjashtuar mundësinë e një zgjidhje tjetër nëse nuk do të ketë reflektim nga ana e PS-së. Ndërkohë, në kuadër të zgjedhjeve të 21 qershorit, kreu i PDS-së ka nisur një tur takimesh edhe në rrethe, ku ka shprehur në të njëjtën kohë pakënaqësitë ndaj PS-së për mosrespektimin e marrëveshjes mes tyre që në zgjedhjet e 2013-s.
Milo kërkon që partia e tij të përfaqësohet në qeveri në post zv.ministri dhe nivel drejtorie. Edhe kryetari i PBDNJ-së, Vangjel Dule nuk e ka gjetur zgjidhjen me kryeministrin Edi Rama për kërkesat që ata kanë.
Në një dalje të fundit për mediat, Dule është shprehur se me Ramën është gjetur konsensusi për Finiqin dhe Dropullin, ndërsa ka divergjenca për Himarën bashki të cilën PS-ja ka shumë gjasë që të mos lëshojë pe, duke rikandiduar kryetarin aktual të Bashkisë, Jorgo Goro. Megjithatë, vetë Dule është shprehur se ai nuk do të kalojë në kampin e djathtë për të krijuar një koalicion të ri, duke theksuar se PBDNJ-ja u shkon deri në fund të katërvjeçarit koalicioneve që ajo lidh.