Festivali më prestigjioz i filmit në botë, ai i Kanës, nisë edicionin e 67-të muajin e ardhshëm me një program të pasur, të kryesuar si gjithnjë me kinematografi franceze.
Festivali mbahet nga 14 deri më 25 maj dhe hapet nga filmi “Grace of Monaco”, ku luan Nicole Kidman. Gjithsej 49 filma të metrazhit të gjatë prej 1,800 sa konkurruan, do të përfaqësojnë 28 shtete.
Filmat që marrin pjesë në konkurrencën kryesore përbëjnë një gamë të gjerë ndërkombëtare, atë që drejtori artistik Thiery Fremaux e quan “rendezvous-ja e madhe e kinemasë”.
Në konkurrencën kryesore janë dy regjisore femra – Alice Rohrwacher me “Le Meraviglie” dhe Naomi Kawase me filmin “Futatsume No Mado nga Japonia”. Jurinë e udhëheq Jane Campion, e para dhe e vetmja femër që ka fituar çmimin e madh të Kanës, “Palmën e Artë”.
Kinemanë franceze e përfaqësojnë Bertrand Bonello me filmin “Saint Laurent”, Olivier Assayar me filmin “Sils Maria”, si dhe Michel Hazanavicius me filmin “The Search”.
Dy herë fituesit e “Palmës së Artë”, vëllezërit Jean-Pierre dhe Luc Dardenne nga Belgjika garojnë me filmin “Deux Jours, Une Nuit”, ku luan Marion Cotillard.
Britaninë e përfaqësojnë Ken Loach dhe Mike Leigj, me filmat “Jimmy’s Hall” dhe “Mr. Turner”, respektivisht.
Në kategorinë kryesore gjithashtu marrin pjesë filmat “Leviafan” nga regjisori rus Andrey Zvyagintsev, “Winter Sleep” nga regjisori turk Nuri Bilge Ceylan, “Timbuktu” i regjisorit mauritian Abderrahmane Sissako dhe “Relatos Salvajes” nga regjisori argjentinas Damian Szifron.
Posteri i shumëpërfolur i këtij viti paraqet një portret të aktorit italian Marcello Mastroianni, i cili luajti në filmin klasik të Federico Fellinit “8½” dhe në filmin “La Dolce Vita”, gjysmë shekulli më parë.