Në kuadër të rregullimit të infrastrukturës në Komunën e Malishevës dhe krijimit të kushteve më të mira për jetë, sot ka filluar asfaltimi i një rruge në fshatin Turjakë, përkatësisht rruga e lagjes së Kajtazëve, e gjatë rreth tetëqind metra, rrugë e cila e lidhë këtë lagje me pjesën tjetër të fshatit dhe me shiritin kryesor të rrugës që e lidh fshatin me qendrën komunale.
Në fillimin e punimeve të kësaj rruge, mori pjesë edhe kryetari i Komunës së Malishevës, Ragip Begaj, i shoqëruar nga drejtorët komunal, me ç’rast i ka uruar banorët e kësaj lagje për rrugën e re, si dhe qëllim i vizitës ishte vëzhgimi nga afër i kryerjes së punimeve.
Edhe kjo rrugë, sikur edhe të tjerat që janë duke u ndërtuar, po realizohen nga buxheti komunal i Komunës së Malishevës.
Komuna e Malishevës, nga fillimi i këtij viti dhe muajt në vazhdim, është duke realizuar shumë projekte që lidhen me infrastrukturën në përgjithësi, si atë rrugore, kanalizime, ujësjellës, pastaj investime në objektet shkollore dhe në fusha tjera, investime të cilat ndikojnë në krijimin e mirëqenies më të mirë të qytetarëve të Komunës së Malishevës.