Rektori i Universitetit “Hasan Prishtina” nuk ndihet fajtor për skandalin me arrestimin e zyrtarëve të fakultetit të mjekësisë.
Ibrahim Gashi thotë se drejtësia e tregon qartë se kujt duhet t’i bie përgjegjësia, meqë veprat e dyshuara nxjerrin në sipërfaqe periudhën e vitit 2009.
“Ne nuk mund të ndihemi përgjegjës për atë kohë që ne nuk kemi qenë në krye të institucionit. Ne ndihemi përgjegjës për luftimin e këtyre elementeve dhe për të marrë masa të mëtutjeshme”, theksoi Gashi si i mysafir në studion e Info Magazinës të Klan Kosovës.
“Duhet të ndahet përgjegjësia. Këtu po flitet për vitin 2009”, potencoi ai.
Për më tepër Gashi bëri me dije se Fakultetin e Mjekësisë e ka gjetur në një situatë të rëndë në momentin kur e mori përgjegjësinë për të drejtuar UHP-në.
“Ne po përballemi me pasojat e një gjendje që nuk e kemi krijuar ne. Ne këtë gjendje e kemi trashëguar, dhe bashkë po tentojmë të japim zgjidhje”, nënvizoi rektori i universitetit publik, transmeton klan kosova.
Gashi i është përgjigjur edhe kritikëve, kur kanë kërkuar që të ndëshkohen edhe profesorët, meqë asistentët dyshohet të kenë ndërmjetësuar.
“Nëse vërtetohet faji për 3 asistentët ndërmjetës, atëherë vërtetohet se ku kanë shkuar ato të holla. Atëherë mund të dihen edhe profesorët. Drejtësia e ka fjalën tani”, tha Gashi.
Por rektori tha se do të jetë në mejdan për t’i luftuar keqpërdorimet.
“Qysh në momentin e parë unë i kam shpallë luftë korrupsionit. Një gjë të tillë ne e konfirmuam edhe në këtë rast kur kërkuam përgjegjësi të drejtpërdrejtë”, përfundoi ai.
Duke komentuar gjendjen në fakultetin e mjekësisë, Gashi tha se të hënën do të caktohet ushtruesi i ri i detyrës së dekanit.