Gazetari i portalit Insajderi.com, Vehbi Kajtazi ka denoncuar sot në polici, kryeministrin e Kosovës, Isa Mustafa për sic thotë ai, kërcënim ndaj tij.
Kajtazi përmes një postimi në rrjetin social Facebook ka shkruar se pret prej organeve të drejtësisë që të veproj me të njëjta standarde edhe në rastin e tij, sikurse me kërcënuesin e djalit të Isa Mustafës, Alban Morinës.
“Sapo kam denoncuar në Polici, kryeministrin e Kosovës, z. Isa Mustafa për kërcënim ndaj meje. Rastin janë duke e hetuar hetuesit e krimeve të rënda në Policinë e Kosovës. Pres prej Policisë, Prokurorisë dhe Gjykatës që të veprojë me të njëjtat standarde sikur në rastin e Alban Morinës, i cili ishte arrestuar, akuzuar, gjykuar e dënuar brenda dy ditësh për shkak të një kërcënimi në Facebook që i kishte bërë djalit të kryeministrit, Besnik Mustafës dhe ministrit Arban Abrashi”, ka shkruar Kajtazi.
Kujtojmë se gazetari Kajtazi dje ka thënë se është kërcënuar në telefon nga kryeministri Mustafa pas publikimit të një lajmi për vëllanë e kryeministrit i cili kishte kërkuar azil, për shkaqe shëndetësore. /Indeksonline/
