Shqipëria u është mirënjohëse Shteteve të Bashkuara të Amerikës për përkrahjen dhe mbështetjen e dhënë.
Kështu u shpreh Kryeministri Edi Rama në përfundim të takimit me Sekretarin Amerikan të Shtetit, John Kerry.
Rama tha se në takimin dypalësh janë diskutuar një sërë çështjesh me rëndësi për vendin, mes të cilave edhe ajo e reformës në drejtësi, e cila pritet të votohet muajin e ardhshëm në Kuvend.
“Diskutuam në veçanti për reformën në drejtësi. U jemi mirënjohës Shteteve të Bashkuara për ndihmën që kanë dhënë veçanërisht për këtë reformë. Obligimi ynë i përbashkët është që marsi të jetë muaji i votimit në Kuvend i paketës së ndryshimeve kushtetuese”.
“Me SHBA’të në krah, kjo e bën të arsyeshëm optimizmin për sukses. Me SHBA’të nuk na ndan asgjë dhe na bashkon gjithçka”, theksoi Rama në konferencën e përbashkët për media.
Rama ka thënë se po thellohet bashkëpunimi me SHBA në fushën e energjisë, ekonomisë, sundimin e ligjit dhe fushat tjera.
“Thellimi i bashkëpunimit me SHBA do të ndikojnë në sigurinë e rajonit”.
“Lidhja jona speciale na jep një përgjegjësi të veçantë për rritjen e sigurisë dhe forcimin e demokracisë në këtë pjesë të Europës”.
“Pa SHBA në krahë, as Shqipëria dhe as shqiptarët, nuk do të ishin sot më të respektuar. Pa mbështetjen dhe këshillat e çmuara të SHBA, Shqipëria nuk do të kishte kaq shumë progres në rrugën e reformës”, ka deklaruar Rama.
Rama, po ashtu, ka deklaruar se Dialogu mes Kosovës dhe Serbisë nuk është një dialog i lehtë, por është pa diskutim e vetmja rrugë për të arritur suksesin.