Një vit pas shpalljes së aktgjykimit fajësues ndaj kryetarit të Komunës së Prizrenit, Ramadan Muja, shkalla e dytë e gjyqësorit nuk ka arritur ende që ta shqyrtojë ankesën e tij, shkruan sot Koha Ditore.
Gjykata e Apelit ka pranuar se brenda kësaj periudhe kohore nuk ka mundur të caktojë seancën për shqyrtimin e ankesës së mbrojtjes së Mujës në lidhje me aktgjykimin e Gjykatës Themelore të Prizrenit, në bazë të të cilit kryetari i Prizrenit bashkë me pesë bashkëpunëtorë të tjerë ishin shpallur fajtorë për shpërdorimin e detyrës apo autoritetit zyrtar.
Sipas zyrtarëve të Apelit, kjo ka ndodhur për shkak se kishte skaduar mandati i gjyqtarit ndërkombëtar që ishte caktuar për këtë lëndë, ndërkohë që për një kohë Këshilli Gjyqësor i Kosovës ka qenë jofunksional dhe nuk ka mundur që të emërojë gjyqtarë të rinj. Ndërsa pas funksionalizimit KGJK-ja ka emëruar gjyqtarët ndërkombëtarë, që tani duhet të presin dekretimin nga presidentja Atifete Jahjaga.