Gjykata Themelore e Prizrenit, Departamenti për Krime të Rënda, ia shqiptoi dënimin UNIK, dënimin me burgim efektiv të akuzuarit me inicialet Q.H. nga Ferizaji, në kohëzgjatje prej 14 vjetësh.
“Dënimi iu shqiptua të akuzuarit pasi u shpall fajtor për veprën penale vrasje nga neni 146 dhe veprës penale mbajtja në pronësi, në kontroll, në posedim ose në shfrytëzim të paautorizuar të armëve nga neni 328 par.2 të KPK-së”, njofton Gjykata Themelore e Prizrenit.
Gjykata thotë se i akuzuari (tanimë i dënuari), në shtëpinë e tij familjare i ka marrë jetën bashkëshortes së tij, tashmë të ndjerës me inicialet A.H..
“Arma të cilën e posedonte pa leje të organit kompetent, shkrep një predhë në pjesën e djathtë të gjoksit të viktimës nga e cila plagë vjen deri te vdekja tani e të ndjerës me inicialet A.H. nga Ferizaji”, ka bërë me dije Gjykata Themelore e Prizrenit, e cila edhe e ka shpallur fajtor dhe dënuar të akuzuarin Q.H. nga Ferizaj.