Gabriele Gravina nuk heq dorë nga rikthimi i skuadrave në fushën e blertë dhe përfundimi i sezonit 2019/2020, në Serie A dhe gjithë kategoritë e futbollit italian. Presidenti i FIGC (Federata Italiane e Futbollit) tregohet i prerë në prononcimin për Gazzetta dello Sport.
“Ndjenja ime e përgjegjësisë më çon të kem një plan B, C dhe D. Sa të jem president i FIGC nuk do të firmos kurrë për bllokimin e kampionateve, diçka e tillë do të ishte vdekja e futbollit italian. Unë mbroj interesat e të gjithëve, kështu që, e përsëris, refuzoj nënshkrimin e një bllokimi total të futbollit.
Përveç kushteve objektive, në lidhje me shëndetin e anëtarëve, trajnerëve, stafit teknik dhe ekspertëve, por dikush duhet të më thotë në mënyrë të qartë. A mund ta imagjinoni me sa mosmarrëveshje duhet të përballemi në rast të ndalimit të futbollit?
Kush ngjitet në Serie A? Kush do rrëzohet një kategori më poshtë? Çfarë të drejtash do të shkelim? Të gjithë bëjnë thirrje për të mos rinisur ndeshjet, qeveria e bën atë, po na imponohet, por unë gjithmonë do t’i respektoj rregullat. Kurrë nuk do të nënshkruaj për pezullimin e kampionatit”, deklaron Gravina.