Zëdhënësi i Policisë së Kosovës në Prizren, Hazir Berisha ka raportuar për protestën që banorët e fshatit Mushtisht kanë organizuar kundër vizitës së sërbëve. Ai tha se protestuesit kanë penguar lëvizjen e lirë të qytetarëve serb.
“Sot, në orët e paradites, një grup rreth 150 qytetarë serbë, në mesin e tyre rreth 50 fëmijë, kanë ardhur me autobusë në fshatin Mushtisht me qellim të vizitës dhe ushtrimit të ceremonive fetare në kishën “Virgjëresha e Shenjët”.
“Vizita e pelegrinëve serbë ka qenë e paralajmëruar dhe e lejuar nga autoritetet shtetërore, por në numër prej 57 pelegrinësh”.
“Policia e Suharekës në vazhdimësi e ka përcjell situatën dhe ka marrë informacione për një protestë të mundshme të fshatarëve dhe për ketë disa herë, e së fundi edhe dje ka biseduar me organizatorët e protestës të cilëve ua ka bërë me dije se çdo kush ka të drejtë të proteston por nuk do të tolerohet pengimi i lëvizjes së lirë të qytetarëve”.
“Ndërkaq, një grup rreth 300-400 persona e kanë penguar lëvizjen e lirë dhe nuk i kanë respektuar urdhëratë e personave zyrtarë”.
“Me ta parë situatën, pelegrinët serb janë kthyer në përcjellje të policisë në drejtim kishës së fshatit Zoqisht i Rahavecit për të kryer rite fetare dhe pas kësaj janë nisur në drejtim të Serbisë pa ndonjë problem. Lidhur me rastin Policia e Suharekës i ka shoqëruar deri në stacionin policor gjashtë qytetarë në cilësi të organizatorëve të protestës për t’i pyetur për bllokimin e rrugës. Pritet vendimi i prokurorit të shtetit se si do të vendos për rastin”./PrizrenPress.com/