“DokuNights” do ta sjellë këngëtaren me origjinë nga Shqipëria, Elina Duni, e cila do të performojë më 25 gusht në Prizren në natën përmbyllëse të “DokuNights”. Nita Deda, drejtuese e komunikimit të festivalit “DokuNights”, u shpreh shumë e kënaqur që Elina do të jetë këngëtarja që do ta përmbyllë këtë vit festivalin.
“Kemi zgjedhur Elinën sepse është një këgëtare e njohur edhe jashtë kufijve shqiptarë dhe muzikën e saj e respektojmë shumë. Pastaj ajo kurrë nuk ka performuar në Prizren dhe është shumë kënaqësi për ne ta kemi në festival”, ka theksuar Deda në një bisedë për Trubina, për performancën e së cilës është zgjedhur një vend ndryshe nga herët e kaluara.
“Performanca e Elinës do të mbahet jo ku i mbajmë zakonisht koncertet e “Dokunights”, por kjo performancë do të mbahet në kinemanë e vjetër të Lumbardhit. Kjo për arsye se muzika e Elinës është më intime dhe kërkon më shumë fokus nga publiku”, ka shtuar tutje Deda, duke premtuar shumë risi në nëntë netët e “DokuNights”, gjatë të cilave do të ketë çdo natë muzikë të zhanreve të ndryshme dhe grupe nga e gjithë bota.