Infrastruktura e hekurudhave të Kosovës “Infrakos” ka ofruar dëshmi në gjyqësor se Komuna e Prizrenit një pjesë të pasurisë që është në emër të kësaj ndërmarrjeje e ka tjetërsuar te personat privatë, duke u dhënë leje ndërtimi.
Kështu së paku shkruan në një aktvendim të Gjykatës Themelore të Prishtinës-Departamenti i çështjeve administrative. Një gjë e tillë sipas kësaj gjykate ka dhënë indikacione se Hekurudhat e Kosovës mund të pësojnë dëme të pariparueshme, shkruan sot Koha Ditore.
Kjo është një prej arsyeve që kjo gjykatë në shtator të vitit të kaluar ka marrë aktvendimin për shtyrjen e ekzekutimit të Planit Zhvillimor Komunal, Planit Zhvillimor Urbanistik dhe dy planeve rregulluese urbane të miratuara nga KK i Prizrenit, deri në marrjen e aktgjykimit lidhur me padinë e “Infrakosit” ndaj Drejtorisë së Urbanizimit.