Ish komandanti i D.T. Nr.2 në operacionin “Shigjeta” ka shkruar një letër të hapur për përfaqësuesit e OVL-së e UCK-së në Kosovë.
Ai përmes kësaj letre ka thënë se i dënon ashpër veprimet e përfaqësuesve të OVL-së të cilët dëshmuan se nuk përfaqësojnë zërin e tyre në mbrojte të vlerave të vërteta të luftës sonë të lavdishme, transmeton Indeksonline.
Kjo është letra e plotë e tij:
Letër e hapur drejtuar përfaqësueseve të OVL-ve në Kosovë
Nga: 1100 zëra të Veteranëve luftëtar të Drejtimit Taktik Nr.2, “Shigjeta” -ZO-Pashtriku
I nderuari Kryetar Gucati dhe antare te kryesis se OVLs ne Prishtine,
Se pari shprehim indinjatën tonë të thellë me atë se çfarë ngjau në Kuvendin e Republikës së Kosovës ndaj motrës dhe bashkëluftëtares sonë Aida Derguti. Kjo ngjarje na tronditi pa masë ne veteraneve të D.T. Nr.2 të Operacionit “Shigjeta”!
Ne pa përjashtim i dënojmë ashpër te gjitha veprimet e disa përfaqësueseve të OVL-së, të cilët na dëshmuan se nuk përfaqësojnë zërin tonë në mbrojte të vlerave të vërteta të luftës sonë të lavdishme. Gjuha e shprehur nga ata individë cenon rende dinjitetin e motrave tona luftëtare, respektivisht të bashkëluftëtares sonë Aida Derguti. Atyre qe nuk e njohin atë ua rikujtojmë se motra jonë Aida është shëmbëlltyrë dhe figurë e rëndësishme i historisë sonë me të re dhe vazhdon të jetë edhe sot. Ajo është shembulli me i mirë se si duhet mbrojtur vlerat e luftës sonë të lavdishme.
Se dyti, ne kuptuam se Qeveria jonë kishte paraqitur në Kuvend ndryshimet e Ligjit të Veteraneve të UCK-së, me qellim të ndarjes tashme të vetë kategorisë së Veteranit luftëtar, në disa kategori të tjera në baza kohore në mënyrë tejet diskriminuese. Në këtë pikë ne të gjithë e mbështesim fuqishëm kauzën e motrës sonë Aida Dergutin dhe të deputetëve të tjerë të Kuvendit, qe e ngritën zërin e arsyes dhe i thanë JO kategorizimit diskriminues të Veteranit luftëtar.
Të nderuar përfaqësues të vërtetë të OVL-ve, thirrni një herë e mirë mendjes dhe kujtojeni se çfarë interesi përfaqësoni. Kujtojeni sakrificën e bashkatdhetarëve tanë, të cilët që nga kontinenti i largët Amerikan, Australia dhe mbarë Evropa, iu përgjigjen shpalljes se mobilizimit nga Qeveria e Kosoves dhe kushtrimit dhe zërit të popullit për liri, deri në çlirimin definitiv të Kosovës!
Na thoni ju, kush nga ne e kishte menduar se lufta jonë e lavdishme do të përfundonte në një të ardhme të afërt. Për hir të së vërtetës kujtojeni betejën e Koshares dhe të Pashtrikut, ku ranë për të mos vdekur kurrë mbi 130 ushtarë tanë.
Luteni, mos shkelni mbi gjakun e tyre, mos shkelni sakrificën e ushtareve tanë, mos i diskriminoni ata. Kujtojmë, Ligji në fuqi edhe ashtu i ndan pjesëtaret e UCK-së, në Invalid të luftës, Veteran luftëtar, pjesëmarrës, pjesëtar dhe kontributdhënës. Bashkohuni edhe ju me zërin e arsyes sonë në mbrojtje të vlerave të luftës sonë të lavdishme, për hir të gjakut të derdhur të dëshmorëve tanë të kombit.
Thuani JO kategorizimit diskriminues të Veteranit luftëtar të UCK-së.
Në emër të Veteraneve të D.T. Nr.2 të Operacioni të “Shigjeta”
Bilall Syla, komandant