Një ish-trajner i gjimnastikës në Lojërat Olimpike Amerikane ka vrarë veten, disa orë pasi u akuzua për sulm seksual dhe trafikim njerëzor, thonë zyrtarët.
Prokurori i përgjithshëm i Miçiganit konfirmoi vdekjen e John Geddert, disa orë pasi deklaroi 24 akuza kundër tij.
Geddert ishte kryetrajner i ekipit të gjimnastikës për femra në 2012 dhe punoi ngushtë me mjekun e ekipit Larry Nassar, i cili u dënua me deri në 300 vjet burg në 2018 për abuzimin e më shumë se 250 vajzave nga pozicioni i tij.
Zbulimet e abuzimit kanë shkaktuar vëzhgim intensiv të Gjimnastikës në SHBA dhe kritika se si mbrohen atletët.
63-vjeçari Geddert kishte në pronësi strukturën e trajnimit në Michigan, ku Nassar kishte shërbyer si mjek i palestrës. Një numër gjimnastësh e akuzuan atë për sjellje abuzive kur ata dëshmuan gjatë gjyqit të Nassar.
Ai pritej të dorëzohej të enjten pasdite por nuk u paraqit, tha zyra e prokurorit të përgjithshëm.
“Zyra ime është njoftuar se trupi i John Geddert u gjet vonë këtë pasdite pasi vrau veten”, tha më vonë në një deklaratë Prokurorja e Përgjithshme e Michigan Dana Nessel.
“Ky është një fund tragjik i një historie tragjike për të gjithë”.
Më herët kryeprokurorja Nessel kishte njoftuar 24 akuza të veçanta kundër Geddert që përqendrohen rreth akteve të shumta të abuzimit verbal, fizik dhe seksual të kryera nga i pandehuri kundër shumë grave të reja.
Dy nga akuzat përfshinin sulmin e pretenduar seksual të një vajze midis moshës 13 dhe 16 vjeç. Ai gjithashtu u përball me 14 akuza të trafikimit njerëzor.