Aleanca për Ardhmërinë e Kosovës, e cila pritet që ta drejtoj qeverinë e ardhshme, ka nisur tashmë që të diskutoj emrat e atyre që do të mund të jenë ministra e zëvendësministra në kabinetin qeveritar të Ramush Haradinajt.
Gazeta Blic nga burime të saja brenda AAK-së ka mësuar se kreu i partisë, i cili njëherësh është edhe i nominuari i koalicionit LDK- AAK-Nisma për të qenë kryeministër dhe që ka mbështetjen edhe të Vetëvendosjes, Ramush Haradinaj, ka përzgjedhur disa nga emrat që mund të jenë ministra e zëvendësministra.
Sipas këtij burimi, Haradinaj ka bërë selektimin e emrave të parë që do të ngarkohen me postet e ministrave, zëvendësministrave dhe të këshilltarëve.
“Zotimi i Haradinajt është se do të punohet me njerëz të rinj, të pastër dhe të përgatitur”, ka thënë ky burim.
Aderimi më i ri i AAK-së, Laura Kryeziu është emri më i preferuar për ta drejtuar një nga dikasteret e qeverisë së ardhshme. Pas saj, vjen Besnik Tahiri, i cili ka qenë kandidat i AAK-së për kryetar të komunës së Prishtinës dhe një ndër njerëzit më të besueshëm të kreut të AAK-së.
Një vend në kabinetin qeveritar pritet ta zë edhe profesori nga Amerika, Zenun Halili, i cili tash e sa vjet është profesor edhe në Departamentin e Shkencave Politike në Universitetin e Prishtinës.
Kryesuesi i departamentit të Shëndetësisë në AAK, Talat Gjinolli poashtu është një nga emrat e mundshëm që të marrë nën drejtim një nga dikasteret e qeverisë, pasi të krijohet qeveria e ardhshme, ka thënë ky burim.
Sipas këtij burimi, si emra të mundshëm që të jenë në poste të zëvendësministrave dhe të këshilltarëve politik janë edhe: Gent Begolli, Musa Gjakova etj.
Këshilltari kryesor i Ramush Haradinajt, Avni Arifi i ka thënë Gazetës Blic se në AAK askush nuk ka diskutuar për emrat e mundshëm qoftë të ministrave, zëvendësministrave e as të këshilltarëve politik, që mund të jenë pjesë e kabinetit të ardhshëm qeveritar. Ndërkaq, dy partitë tjera partnere të koalicionit, ata të LDK-së dhe ata të Nismës për Kosovën ende nuk kanë nisur të mendojnë për emrat që do të mund të jenë pjesë e kabinetit qeveritar të Ramush Haradinajt.
Si nga LDK-ja poashtu edhe nga Nisma për Kosovën kanë thënë se janë në pritje të certifikimit të rezultateve nga ana e KQZ-së, për të parë se kush ka arritur të futet në Kuvend e kush jo, në mënyrë që pastaj të bëhet edhe ndarja e posteve ekzekutive.